• Binanın forması Azərbaycanın qədim musiqi alətlərindən olan tarın hissələrini xatırladır. Ən müasir texnologiyadan istifadə edilməklə tikilən bina üçün lazımı avadanlıq İtaliya, Avstriya, Fransa və Türkiyədən gətirilmişdir.
Xəbərlər

Beynəlxalq Muğam Mərkəzində IX “START” Beynəlxalq Qısa Filmlər Festivalı qaliblərinin mükafatlandırma mərasimi keçdi.

 
Noyabrın 17-də IX “START” Beynəlxalq Qısa Filmlər Festivalı sona çatdı.
Festival Azərbaycan Respublikası Prezidentinin “Azərbaycan kinosunun 120 illiyinin qeyd edilməsi haqqında” Sərəncamına dair tədbirlər çərçivəsində keçirilmişdi.  
Festival Mədəniyyət, Gənclər və İdman nazirlikləri, “SİNEMA” Gənc Kinematoqrafçılar Mərkəzinin təşkilatçılığı, Gənclər Fondu, Azərbaycan Prodüserlər Gildiyası, Nizami Kino Mərkəzi və “CinemaPlus” kinoteatrlar şəbəkəsinin dəstəyi ilə həyata keçirilmişdi. 
Mərasimdə çıxış edən festivalın direktoru Fehruz Şamıyev qeyd etdi ki, festival gənc rejissorların qısametrajlı filmlərinin (35 dəqiqəyə qədər) müsabiqəsini və nümayişini nəzərdə tutmuşdu. Festivala 45 ölkədən 490 qısametrajlı film təqdim olunmuşdu. Təşkilat Komitəsinin təyin etdiyi seçim komissiyasının qərarına əsasən, Beynəlxalq və Yerli müsabiqələrdə “Qızıl nar” mükafatı uğrunda 30 ölkədən 100 film mübarizə aparmışdı. Onlardan Beynəlxalq müsabiqənin proqramına 72 film, Yerli müsabiqə bölməsinə isə 28 film daxil edilmişdi. 
Qalibləri - Beynəlxalq müsabiqədə Ayaz Salayev (Azərbaycan), Kambuzia Partovi (İran), Gülbara Tolomuşova (Qırğızıstan), Tobias Büxner (Almaniya), Zəhra Bədəlbəyli (Azərbaycan) tərkibində; 
-Yerli müsabiqədə isə Mirbala Səlimli, İlqar Fəhmi, Cavid Təvəkkülün (hamı Azərbaycan) daxil olduğu münsiflər heyətləri seçirdilər. 
Sonra qaliblərin adları elan edildi. Beynəlxalq müsabiqənin “Qızıl nar” mükafatı uğrunda “Ən yaxşı bədii film” nominasiyasında türkiyəli rejissor Onur Yağızın “Topraq” filmi, “Ən yaxşı sənədli film” nominasiyasında iranlı rejissor İman Behruzinin “Əsl məhəbbət” filmi, “Ən yaxşı animasiya filmi” nominasiyasında almaniyalı rejissor Conatan Şvenqin “Daşqın” filmi, “Ən yaxşı eksperimental film” nominasiyasında isə türkiyəli rejissor Alican Durbaşın “Torpaq” filmi elan edilmişdi. 
Yerli müsabiqənin qalibləri isə “Ən yaxşı bədii film” nominasiyası üzrə Pərviz Gülməmmədovun “Oğul” filmi, “Ən yaxşı sənədli film” nominasiyası üzrə Emil Əlinin “Adam” filmi, “Ən yaxşı rejissor” nominasiyası üzrə Orxan Adıgözəlovun “Bir saniyə” filmi, “Ən yaxşı ssenari” nominasiyası üzrə Fərid Kərimin “Sonar” filmi, “Ən yaxşı operator” nominasiyası üzrə isə Elvin Əhmədoğlunun “Yaddaş” filmi seçildi. 
Mükafatlar qaliblərə təqdim edildi.
Xatırladırıq ki, Beynəlxalq Muğam Mərkəzində muğamın, milli, klassik və  
etnik musiqinin təbliği və inkişafı məqsədi ilə həyata keçirilən tədbirlər və 
möhtəşəm yaradıcılıq layihələri davam edir. 
 17.11.2018